पुणे : चतुरंग प्रतिष्ठानतर्फे येथे प्रथमच होणाऱ्या रंगसंमेलनात ‘चतुरंग’ने पुणेकर रसिकांसाठी भरगच्च कार्यक्रम आखले आहेत.

सॅक्सोफोन आणि बासरीच्या ‘नाद नभांगणी नाचतो’ या वादनजुगलबंदीने रंगसंमेलनाला सुरुवात होणार आहे. विद्वान पं. कद्री गोपालनाथ आणि पं. रोणू मजुमदार यांच्या या ‘वादनारंगा’ला पं. अरविंद आझाद (तबला) आणि बी. विजया नटेशन् (मृदुंगम) यांची साथसंगत लाभणार आहे. कविवर्य ग. दि. माडगुळकर आणि गायक सुधीर फडके यांनी अजरामर केलेल्या गीतरामायणाला नृत्यसाज चढवून नृत्यांगना सोनिया परचुरे, नकुल घाणेकरसह ४० नृत्यकलावंत ‘नृत्यस्वरूप गीतरामायण’ सादर करणार आहेत.

नाना पाटेकर, सुमित राघवन, सतीश राजवाडे, इरावती हर्षे यांच्यासह सुधीर गाडगीळ यांचा गप्पांचा कार्यक्रम रंगणार आहे. डॉ. गिरीश ओक, लीना भागवत आणि योगेश सोमण हे ‘नाट्यरंग’ हा कार्यक्रम सादर करतील. ‘ज्ञानरंग’मध्ये डॉ. रघुनाथ माशेलकरांची मुलाखत ‘जडण-घडण’चे संपादक डॉ. सागर देशपांडे घेणार आहेत. ‘स्नेहरंग’मध्ये उपस्थित रसिकांना रंगसंमेलनात सहभागी झालेल्या कलावंत आणि मान्यवरांसह चहापानाची संधी मिळणार आहे.  

याच दरम्यान व्यंगचित्रकार विकास सबनीस, शिल्पकार डॉ. मुकुंद राईलकर आणि चित्रकार अरूण दाभोळकर यांच्या प्रात्यक्षिकांचाही आनंद रसिकांना घेता येणार आहे. या वेळी जीवनगौरव पुरस्काराचे वितरण केले जाणार आहे. रंगसंमेलनाचे स्वागताध्यक्षपद अभिनेते मोहन जोशी भूषवणार आहेत. या प्रसंगी सिक्कीमचे राज्यपाल श्रीनिवास पाटील यांच्यासोबत डॉ. अरविंद जामखेडकर, डॉ. विनय सहस्रबुद्धे, विजय कुवळेकर, डॉ. सर्जेराव ठोंबरे, डॉ. सागर देशपांडे, डॉ. विणा देव उपस्थित राहणार आहेत.

या रंगसंमेलनाचे उद्घाटन पुणेकर कलाकारांच्या हस्ते अभिनव पद्धतीने केले जाणार आहे. यामध्ये दिलीप प्रभावळकर, आशा काळे-नाईक, रोहिणी हट्टंगडी, मोहन जोशी, रवींद्र साठे, सुहास बहुळकर, सुधीर गाडगीळ, सोनाली कुलकर्णी, सुबोध भावे, मिलिंद फाटक, मृणाल कुलकर्णी, सावनी शेंडे-साठे, योगेश सोमण, गिरीश कुलकर्णी, मुग्धा गोडबोले, निपुण धर्माधिकारी, ओम भूतकर, प्रवीण तरडे, मानसी मागीकर, राहुल सोलापूरकर, उदय टिकेकर, शार्वरी जमेनीस, शशांक केतकर, अलोक राजवाडे, विभावरी देशपांडे, रवीमुकुल, आरोह वेलणकर यांचा समावेश आहे. या संमेलनाचे सूत्रसंचालन सुनील बर्वे करणार आहेत. रंगसंमेलनाची सांगता ‘गानरंगा’ने होणार आहे.  

उद्घाटनाविषयी :
दिवस : १६ व १७ डिसेंबर २०१७
वेळ : सायंकाळी चार ते रात्री १०
स्थळ : गणेश कला क्रीडा रंगमंच, स्वारगेट, पुणे

प्रवेशिकेसाठी : www.ticketees.com

संपर्क :
वरदा : ७०३०२ ५५००४
अमेय : ८३२९४ ५२५४३
बाळा : ७७०९५ ३३३३५